今屆明星賽在達拉斯舉行，正賽地點已決定喺NFL球隊牛仔嘅露天主場上演，希望吸納十萬球迷入場逼爆明星賽。歷年超級碗決賽平均入座率達到九萬人，所以小牛班主古班預言今屆明星賽入座率可以超越超級碗，同時打破NBA賽事入座人次新高。

艾佛遜亦可能甩底

NBA官方亦公布，已向全球二百二十個國家賣出今屆明星賽嘅轉播權，因明星賽周長達三日時間，要超越超級碗決賽全球八億觀眾嘅收視，並非癡人說夢話。而今屆明星賽轉播費亦創新高，每秒達到二百六十萬美元，預計收視肯定會超越上季湖人對魔術嘅NBA總決賽。

可惜今屆賽事卻撞正明星傷患潮，「蜂王」基斯保羅及萊爾早前已因傷退賽，而最令球迷擔心莫過於湖人戰神高比拜仁，佢正受足踝傷患影響，已缺席湖人三場賽事，有機會因此退出明星賽。另方面，艾佛遜近期亦因私人理由缺席76人四場比賽，話唔定情緒化嘅「AI」連明星賽都「甩底」，若然佢同高比仔都唔出戰，今屆肯定大為失色。

明星賽show time

周六10:00am 新秀對抗賽

周日8:00am H.O.R.S.E投籃賽

周日9:30am 混合投籃賽、技巧挑戰賽、三分賽、入樽賽

周一9:00am 明星賽 ＊香港時間

■本報綜合報道