本文重點
正所謂打波叻未必教波叻，何況係做管理層！米高佐敦自退休後先後出任巫師及山貓嘅高層，可惜多年嚟眼光奇差，經常引入水貨連累球隊。不過，「波神」上季邀得殿堂級教練拉利布朗任教，今季換入史堤芬積遜又獲得成功，總算挽回唔少聲譽。
佐敦自○三年退役後，隨即成為巫師事務總監，可惜上任後幾個決定都唔掂檔，包括將當時正上位嘅咸美頓換走，換入已走下坡嘅史達侯斯，最終咸美頓加盟活塞第二季就奪得總冠軍，令巫師球迷非常氣憤，佐敦僅上任數月就被巫師班主波連辭退。
「波神」○六年再戰ＮＢＡ，成為山貓股東之一並出任球隊事務總監，不過眼光卻毫無改進，繼多年前為巫師選中超級水貨狀元加美布朗後，○六年又浪費三號籤為山貓揀咗阿當摩利臣，錯失萊爾、朗度及基爾等新星。
引入史堤芬積遜算佳作
幸好佐敦近年決定有好轉，好似上季請到拉利布朗做教練，助山貓創下球隊史上最佳成績35勝47負，而早前亦博一鋪引入史堤芬積遜，助球隊戰績穩步上揚。