本文重點
【本報綜合報道】矢志衝擊常規賽MVP寶座嘅「甜瓜」安東尼，尋日面對紐約人時，轟入職業生涯最高嘅50分，協助金塊以128比125險勝，總成績去到12勝4負。現時安東尼平均得分已達到30.9分，超越佢過往六季嘅成績，除咗爭MVP之外，連得分王都有「餐士」。
艾佛遜「食言」返費城
金塊球迷為咗幫安東尼助威，當「甜瓜」攞波後即大嗌「MVP、MVP」嘅口號，難怪令佢打得特別起勁。安東尼今場起手達28次中17球，而罰球就15射14中，結果全場豪取50分，打破個人職業生涯新高。「甜瓜」賽後表示：「如果我話畀你聽我唔想攞50分，就一定呃你，我的確好開心做到，但最重要係我尾段射入兩個關鍵罰球，令球隊獲勝。」
安東尼今季平均得分已達30.9分，剛超越30.1分的高比拜仁及29.4分的勒邦占士暫列首位，大有機會搶走得分王寶座。
另方面，幾日前宣布退休嘅「AI」艾佛遜，話咁快就有機會「食言」，據美國傳媒消息，艾佛遜嘅舊東家76人會以200萬年薪簽番佢，據稱「AI」亦已抵費城作體測，成事機會極高。