若要數ＮＢＡ最年輕有為球隊，西岸有拓荒者，東岸代表就係鷹隊。鷹隊早年致力重組，在選秀會上羅致咗荷福特、祖斯史密夫及馬雲威廉士等潛質優厚嘅球員，結果呢幾名廿歲出頭嘅年輕人浸咗幾季之後，終於擔到大旗。此外控衞碧比季前願意減薪續約，而祖莊遜為求於明年爭取頂薪合同，今季亦大打身價波，因此鷹隊現時陣容，的確有力左右東岸大局。

「鷹王」主場七戰全勝

至於魔術，經過短短十多場比賽後，已證實季前羅致卡特係明智之舉，「老飛人」今季表現令人諗番喺佢身披速龍戰衣嘅時代，平均上陣30.4分鐘就拿下18.7分，係球隊中嘅得分王。雖然正選控衞尼爾遜近期受傷，但替補嘅積遜威廉士表現毫不失禮，最近魔術有主將缺陣都連勝五場，狀態勇銳。但基於鷹隊今季主場出戰七仗全勝，所以魔術作客「地獄主場」肯定唔易打，鷹隊有機會藉主場氣勢擊敗魔術。