今日係佛誕，本應尊重一下佛祖慈悲為懷嘅作風，化怒氣為祥和，不過講到港府點樣姑息包庇人稱「戴妖」嘅邪惡教授戴耀廷，對佢呢幾年嚟涉及選舉操控都完全唔做嘢，就真係佛都有火呀。
呢，立法會政制事務委員會尋日開會，有議員就對港府對於嗰啲懷疑涉及選舉操控嘅「計劃」冇晒符感到擔心，佢哋問港府點睇戴妖嘅「風雲計劃」，事關戴妖講明要讓泛民喺出年區議會選舉搶到過半議席，仲叫啲「政治素人」刪走晒社交媒體入面言論，避免因為主張港獨自決而被DQ；有議員提出應該調查埋呢啲計劃後面，係咪有幕後黑手透過捐錢嚟操控選舉，質問政府對呢啲懷疑涉及選舉操控嘅事一直姑息懶理，仲點樣維持廉潔公平嘅選舉？政制及內地事務局副局長陳帥夫就話嘞，其實選舉管理委員會前年有收到投訴，已經交畀執法部門跟進，做緊嘢喇咁話。
喂，前年當局就收到投訴，點解查到今日仲未有結果？點解繼續坐視戴妖搞搞震禍港？戴妖係戴罪之身，佔中嗰筆都未算清，佢老哥就轉換戰場，先搞雷動計劃影響前年立法會選舉，雷動計劃失敗後又過台灣、澳門宣揚港獨，家陣仲要搞「風雲計劃」，香港選舉幾乎被佢玩晒，講到底咪就係港府廢，唔正視、唔處理呢啲唯恐天下不亂嘅搞事分子，至會引發咁多選舉亂象囉。
大家有眼睇，戴妖前年用「雷動計劃」教選民投票畀計劃推薦嘅候選人，受佢影響嘅選民就已經唔係以自由意志去投票，涉嫌操控選舉水洗唔清，偏偏港府視而不見，見而不理，拖到家陣至話可能涉及干預選舉，交畀執法部門去查，遲唔遲啲吖。唔好畀人估中，港府所謂調查又係虛應故事，先係拖字訣，之後再大玩放生，好似漢奸黎單政治黑金案咁，一時「證據太多」，一時「證據不足」，官字兩個口，乜都佢講晒。
退一步講，就算真係將戴妖落鑊檢控，都唔代表正義可以伸張，事關司法係反中亂港勢力嘅最大保護傘，長毛黑金案不了了之，雙學三子衝擊政總案終審得直，一早見怪不怪咯。港府老虎屁股摸不得，走狗尾巴不敢碰，呢班友有恃無恐，唔鬆毛鬆翼至奇，戴妖搞完佔中搞雷動，搞完雷動搞風雲，咪就係睇穿港府廢柴本色囉。
冇符喇，香港話就話係法治之區，實際上係法律面前人人不平等，試吓涉嫌操控選舉嘅唔係戴妖，而係建制派，一早拉得審得判咗嘞，點可能拖到依家仲得個講字！