陳曉明出山拍達Sir變天

今季聯賽煞科日前，理文已有易帥消息傳出，該會終在昨日公布，新一季將由陳曉明擔任球隊主教練，並由曾昭達出任其副手，其他教練團成員包括留任的林慶麟、唐咖名和陳鴻平。在本地球圈人緣極佳的「曉明Sir」近兩年在澳門足總工作，原先擔任技術總監，直至去年7月因澳門代表隊原主教練「譚Sir」因私人理由請辭，開始接替代表隊主帥，領軍征戰過多場國際熱身賽及亞洲盃外圍賽，儘管成績方面未有太大突破，但卻贏盡各界口碑。

進化版曉明唔止淨係教

本身擁有AFC Pro License的「曉明Sir」對上一次執教本港球會，已是2011至12球季的天水圍飛馬，對於「今日的我」與當年的分別，「重出江湖」的「曉明Sir」表示：「之前嘅我會好着重『教』嗰方面，但今時今日要做好一支職業球隊，其實好着重成個配套嘅管理，好似市場推廣、行政、體適能、醫療、運動心理等等，都好影響球隊，唔可以淨係去『教』。呢幾年，我上咗Pro License，亦去過好多唔同國家同地區工作，對管理一支球隊有一啲體會，我會畀個球圈包括球迷、其他球隊睇到我嘅轉變，我嘅『進化版』。」

理文會長李文恩（左）和愛妻皆十分支持球隊。	談樂軒	陳衍光

「唔踢悶蛋波 要好睇好食」

新官上任，許多時為了站穩陣腳或爭取成績，萬事都以戰果為先，出現「泊大巴」、「悶蛋足球」，「曉明Sir」卻事先聲明：「職業球隊需要成績去支持係無可厚非，但足球喺成個長遠建立都係一個表演事業，所以我第一日建立一隊波嘅時候，都會朝踢得亮麗嘅方向，着重一啲好睇又好食嘅打法，同令球迷讚賞嘅足球。一場半場因應戰術而沉悶？會，但長遠發展係要建立一支踢出悅目足球去贏波嘅球隊，呢個亦係我執教理文嘅目標。」

近年本地球圈出現一個熱門話題，就是球隊偏重外援或入籍兵，忽略了本地球員的發展，甚至出場機會，這方面「曉明Sir」亦有其見解，他謂：「不同球隊有不同方針，有啲係要爭標，有啲就為咗青訓，各師各法。理文係希望打出成績，所以我都會重用外援，希望佢哋可以喺場上帶動到本地球員，但我作為一個土生土長嘅香港人，絕對唔會淨係為咗成績，完全唔去理本地球員嘅感受，我會好慎重咁去攞個平衡。」

4土炮加盟繼續掃貨

隨着「曉明Sir」執掌，多名本地球員亦慕名追隨轉投理文，第一階段公布的新球員就有鄭兆鈞、余煒廉、談樂軒和陳衍光；另外援方面除留用域陀和史提芬彭利拿外，將會加入2名中堅及1名前鋒，詳細資料將於下月初陸續公布。

理文新季球員In & Out

In (尚有多名新兵待下月初公布)

鄭兆均、余煒廉、談樂軒、陳衍光

Out

謝朗軒（外借期滿）、林柱機（外借期滿）、陸平中、利馬、盧斯安奴、趙俊傑、孫文哲、文家永、李啟智