政情：胡志偉向錢看同李華明割席？
早排民主黨（白鴿黨）就搞咗籌款晚宴，佢哋請咗特首林鄭月娥出席，林鄭仲當場認捐咗三萬蚊畀白鴿黨，贊助該黨嘅立法會前議員李華明（Fred）獻唱。呢件事惹起外界強烈反彈，連日嚟黨主席胡志偉已多次就事件解畫，話日後政府有唔妥當嘅地方會繼續出聲。但有啲民主派仍然不滿，人民力量成員劉嘉鴻尋日就喺電視論壇上，力數阿Fred近年嘅言論偏向建制，搞到胡志偉火起，爆Seed：「李華明不代表民主黨。」唔通咁快就劃清界線？
指「李不代表民主黨」
事緣胡志偉尋日喺論壇上，再次就三萬蚊事件解畫，話嗰晚係該黨嘅黨慶同埋籌款晚會，歡迎當晚獲邀嘅嘉賓慷慨解囊，以支持民主嘅工作。佢仲苦笑咁話走溫和路線嘅政黨，無論做任何事情、用任何應對方式都會受到批評，所以個黨會繼續「揸緊自己要做嘅工作」，未來會堅持地區工作，確保市民可以得到港人治港、高度自治嘅社會，並且擴大支持面。
聽完胡志偉嘅一番解說，劉嘉鴻明顯好唔滿意，隨即大鬧話地區工作，同邀請、甚至接收林鄭嘅捐款有咩關係？之後佢就翻舊帳，將近年阿Fred嘅言論數晒出嚟，仲話白鴿黨反對香港高爾夫球會喺粉嶺續租，但阿Fred仲做高爾夫球會顧問等等，仲反問胡志偉收三萬蚊係咪可以團結到民主派？
胡志偉之後再回應，話李華明係白鴿黨嘅普通黨員，有自由發言嘅空間，而且該黨嘅言論係由黨內領導層決定。佢仲話每個組織都有唔同意見，作為有責任嘅政黨唔係同人切割，而係要廣交朋友，盡努力將政黨同政府嘅距離收窄。跟住佢亦重申該黨係反對高爾夫球場續租。但係佢一路講，劉嘉鴻就不停打斷佢嘅說話，搞到佢最終爆Seed：「李華明不代表民主黨。」
胡當年係李接班人
不過講番轉頭，當年阿Fred做立法會議員嘅時候，胡志偉就係佢嘅接班人，而且阿Fred過去係白鴿黨籌款委員會嘅主席。雖然話阿Fred就已經退下火線，但今次林鄭捐三萬蚊，都係贊助阿Fred唱歌，亦即係代表白鴿黨啦！之不過，依家胡志偉又咁講喎，唔通白鴿黨認錢唔認人？