中環出更：談人工智能危險性 劉怡翔「撈過界」
人工智能（AI）係近年興起嘅熱話，但著名物理學家霍金喺生前就多番警告大家要小心AI。財經事務及庫務局局長劉怡翔尋日都喺網誌藉惋惜霍金近日離世而大談AI，唔通佢撈過界搞創科？
籲應用金融上要平衡風險
劉怡翔講起霍金生前多次表達對AI嘅擔憂，曾以無人駕駛為例，指喺緊急情況下，無人駕駛汽車需要喺「好有可能發生嘅輕微事故」同「較低可能發生但嚴重事故」之間作選擇，處於兩難。
佢指近日美國發生自動駕駛汽車嘅致命交通意外，令人疑惑到底係無可避免，定係人類過分依賴自動駕駛系統，而警覺性降低。佢又話，霍金曾講過人類長遠要面對AI系統失控嘅潛在風險，假若AI脫離束縛，有超級智慧嘅機器人就會崛起，有可能不遵循人類意願行事，反問科幻電影片段真係唔會喺現實世界發生咩？
即係話有危險性喇！佢形容AI係「雙刃劍」，希望會成為資產而非負累，當局喺推動AI、應用金融服務時，要平衡創新同控制風險喎。睇嚟都係因為該局近排搞金融科技，令佢咁感觸嘞！
卓妮