中環出更：身任國際天九協會榮譽會長 樹根自爆原來唔識打
新界傳統文化之天九王大賽尋日喺沙田鄉議局大樓舉行，立法會前議員鍾樹根（樹根）突然做咗國際天九協會榮譽會長，但佢自爆唔識打，但有份主辦今次比賽嘅上水鄉事委員會主席侯志強就話唔識寫個輸字，贏係無止境、無極限，如果冇貪心就冇上進喎，但「點都會留番條底褲畀人」，又打算今年內再搞省港澳盃，之前再搞全國大賽同國際級大賽添！
樹根同太太都唔識打天九，仲話早知帶埋外母嚟，事關外母識打，而佢又唔敢向外母請教點打喇，怕外母嫌佢學唔識喎。佢又話朋友仲特登畀咗本書佢學打天九，佢打算搭飛機嗰陣自學喎。
侯志強贏極都「留條底褲畀人」
侯志強自細識打天九，佢話「落場無父子」，但新界人有修養，就算對手輸錢，「點都會留番條底褲畀人」，唔會令人光住屁股走出嚟，自己唔識寫個輸字，依家慢慢學緊，仲話贏又要學，輸又唔好氣餒，保持心情靚喎。呢個理念係咪可以用喺選舉呢？佢就話樣樣都係，人生無常，輸完又嚟玩過，輸得起就得啦！咁下次補選仲係咪參與呢？佢就話會積極考慮，但又話「呢次我都冇玩啦」，有時好難講，「一石激起千重浪，如果有頑石激起就玩吓囉」！
卓妮喺馬場撞到立法會議員劉國勳，佢話細個屋企冇人就會叫埋啲朋友上嚟玩啤牌同打麻雀，但係就唔會用錢，而係以閃卡投注，一張閃卡等如十張普通卡，好彩就未輸過心愛嘅閃卡，仲贏過啲心愛嘅閃卡返嚟添！佢話依家好難搵到四個立法會議員一齊打麻雀嘞，不時都會搵區議會啲兄弟一齊打，仲會一邊打牌，一邊交流吓公事喎。
卓妮