為母校拍片籌款 梁智宏巧遇學兄
喇沙小學早前開始一系列籌款活動，希望重修校舍，身為喇沙仔、「丑生王」梁醒波個孫梁智宏（Andrew）亦都落手落腳出一分力，搵咗十幾位學兄，拍咗一系列短片講下母校，亦因為咁巧遇愛心爆棚嘅學兄顏獻基（John）醫生。
阿John話喺學校一向好守規矩，唯獨有一次，老師搵一位同學幫手落教員室攞簿，醉心音樂嘅佢知道學校樂團正喺度練習緊，於是自告奮勇幫手，當佢經過禮堂見到樂隊練習嗰陣就被深深吸引住，結果聽到過晒鐘先返到課室，事後校長知道呢件事唔單止冇罰佢，仲破格咁幫佢去中學部樂團要求畀佢跟操，自此佢就踏上咗小提琴之路。
慈善演奏會 傳播關愛
後來做咗醫生，佢又結識咗班志同道合嘅醫生同音樂人，大家都覺得社會上仲有好多「被遺忘嘅人」，於是組成醫藝盟（Medart）繼續到醫院同監獄表演畀病人同囚友欣賞，亦四出探訪弱勢社群，更組成醫護團隊到國內，免費為一啲有先天缺陷或可治愈嘅孤兒施手術添！佢仲話嚟緊十二號會喺大會堂舉行慈善演奏會，到時除咗演奏由囚友創作嘅曲目之外，亦會有曾獲受助嘅孤兒做分享，希望將關愛嘅訊息傳播出去。