政情：白鴿提棄保「反枱」泛民初選冧檔

話舊方案決定補選候選人唔公平

據了解，白鴿黨喺協調會議上提出「棄保」方案時，亦對初選以民調計算方法好有意見，仲舉例指自決派朱凱廸喺舊年立法會選舉中，早段期間喺新界西嘅民調中一直落後，但最後大幅上升，認為如果喺未做宣傳就以民調決定出選與否，唔係一個公平嘅安排。聽聞當日白鴿黨提出棄保方案後，有民協嘅成員大感不滿。

事實上，白鴿黨提出「棄保」都有迹可尋，睇番九龍西補選，若果現行方案不變，現時幾個候選人當中，擁有唔少地區樁腳嘅民協或會係最大得益者。換言之，對民協嘅立法會前議員馮檢基會係最有利，相反白鴿黨嘅區議員袁海文就似乎冇咁佔優，難怪白鴿黨會諗住推「棄保」，好明顯係出於私心喇！

若採棄保 即推翻讓路予游蕙禎

如果採納咗「棄保」方案，白鴿黨可能打算喺短短幾星期之內捧紅袁海文，令佢最終成為民調得分較高嘅一個，但同時亦有風險，事關袁海文最後會唔會成功彈起，到依家都仲係未知之數。

其實九龍西補選嘅議席，原本係屬於被法庭取消立法會議員資格嘅青年新政游蕙禎，按照泛民一貫作風，理論上應該要「讓路」畀游蕙禎，又或者係其同路人。雖然游蕙禎依家唔傾向參選，但係佢都落力參與初選嘅事，而佢就建議初選前應該要舉行公開對談，甚至建議調整初選嘅行政費用。若果真係採納白鴿黨嘅「棄保」方案，即係完全推翻讓路呢回事嘞！

至於新界東補選方面，立法會前議員鄭家富尋日就宣布，話自己將會喺呢次補選中退出，仲話唔會喺初選中，個別支持任何候選人。雖然有人退出，但係睇依家個勢，各方都有唔同意見，再咁搞落去，初選都搞唔成喇！