政情：阿Bill落區揮毫自嘲招搖撞騙
身兼勞工顧問委員會成員嘅立法會前議員鄧家彪（Bill），經常喺facebook分享練跑相片，但佢話踏入二○一七年就冇時間去跑，雖然佢並無因為疏懶而增磅，但就大嘆辛苦鍛煉番嚟嘅肌肉已經變番做肥肉囉！
半個月冇跑 打波周身痠
半個月冇得跑步，已經令阿Bill心急再跑番步，因為佢擔心放低太耐會令佢缺乏動力重拾跑鞋，直言跑開就會想跑。不過，佢知道沙田區議員每逢星期一都會打羽毛球，所以依家即使無時間跑步，都會跟埋佢哋打波當做運動，又話自己嘅球技雖然唔叻，但都叫回到個波咁囉。同埋佢因為少咗做運動，依家打完波都會周身痠軟，睇嚟遲吓要有排操先得喎。
農曆新年臨近，阿Bill現時主力落區練字寫揮春，又會去做家訪，再加上新界東範圍大，所以先搞到冇時間跑步，但佢話手字唔靚，笑稱自己「招搖撞騙 」。咁勤力落區，仲係新界東，唔知佢係咪決定會參加立法會新界東補選呢？