政情：張炳良下屆唔撈吳得掂條氣唔順鬥呻

張：公屋需輪四年感挫敗

張炳良尋日出席電台節目時，回顧自己五年嘅局長生涯。佢話當初應邀做局長，冇諗過要搞交通運輸，點知政府架構重組失敗，房屋同交通事務冇得分開，處理交通事務反而佔咗佢六、七成時間；至於房屋政策方面，依家公屋平均輪候時間超過四年，情況比佢預期差，令到佢有挫敗感，並認為政府換屆要有新思維。講咁多總結，原來佢已打算無論邊個做特首，下屆都「唔撈」，佢話當年接受任命做局長時，已決定淨係做一屆，之後就「交棒」，係基於個人規劃，並非針對任何特首參選人。

至於每當有參選人提到下屆班子要「換血」，大家都會聯想到吳得掂一定冇得撈。佢尋日同傳媒午宴時，唔知係咪因為任期將盡，都忍唔住為自己大反擊，對於被批評經常外訪，佢話「條氣好唔順」，有啲批評更加係對佢人格謀殺，而每次外訪，同事個個都做到「攤攤腰」，行程亦都非常透明。

吳：你要玩我都冇嘢好講

吳得掂又重提前年去日本賞紅葉而缺席立法會小三全港系統性評估（TSA）公聽會，佢解釋當時太太身體已唔係好好，所以安排放假成家人去旅行，當知道同公聽會撞期，已即時提出其他可行嘅開會日期，但外界就將佢放假計埋入外遊，直言「如果你唔尊重人哋呢方面嘅basic right（基本權利）……你要玩我，我都冇嘢好講」。

有人唔撈，有人冇得撈，但有人就搲撈。好似政務司司長張建宗早前已講過只要有人邀請佢加入班子，無論乜嘢崗位都唔介意。財政司司長陳茂波就有傳依家接任等如試用期，如果做得好，前政務司司長林鄭月娥又選得到特首，佢就有機會留任。但亦有傳言指因為佢冇得留低，依家先會畀佢過幾個月司長癮喎。