政情：「撐林」「倒林」律師會爆網戰
律師會將於明日召開特別會員大會（EGM），處理三名會員任建峰（Kevin）、蔡家玲同吳少雲，向會長林新強（Ambrose）提出嘅不信任動議。支持同反對陣營近日除咗透過傳媒展開口水戰互數對方不是，原來亦有發動網絡大戰，分別喺社交網站開設群組宣傳自己立場，暫時雙方都攞到約一千個「like」（讚好）。
倒林一方早喺上月中開咗個「Solicitors' EGM 2014 律師特別會員大會 2014」群組，截至尋晚有約一千個like。群組上載咗多篇相關報道同訪問片段，向會員發出嘅電郵等，最緊要嘅就係叫人提交支持動議嘅proxy（授權）票。
撐林組暫稍勝
至於撐林一方亦不甘示弱，喺上月底都開咗「EGM 2014 for The Law Society」群組，至今有逾一千三百個like。群組上載咗佢哋嘅支持者信件、Ambrose喺記者會嘅發言同訪問原文、控告《蘋果日報》誹謗嘅入稟狀等。