之前放風話自己中學文憑試成績達大學門檻，但因部分科目正等候覆核結果而拒絕透露大學聯招取錄結果嘅學民思潮召集人黃之鋒，尋日終於確定覆核失敗，成績維持原判。
黃之鋒喺社交網站自爆，文憑試攞到19分，最後獲公開大學社會科學榮譽學士（政治及公共行政）學系取錄。佢話自己從來唔係成績最頂尖嘅學生，大家唔使因為佢入咗公開大學而失望或者開心，正如佢喺放榜當日所言，「自己成績自己負責」，考到19分，對佢嚟講不過不失。黃之鋒又話，希望入學唔好累及其他公開大學嘅同學，唔好講咩「黃之鋒搞政治讀唔掂書最後咪要讀OU」，佢強調喺香港只有一成七考生能考入大學，做到大學生已唔容易。公大校長黃玉山接受查詢時話，自己唔過問收生情況，叫大家畀啲空間黃之鋒喎！