中環出更：入境處靚女 「電暈」陳為廷
苦中作樂係做人最高境界，台灣太陽花學運領袖陳為廷前日來港準備參加七一遊行，但遭入境處拒絕入境，要原機遣返。正當大家以為佢充滿憤怒飛返台灣之際，原來陳為廷都有啲得着，就係識到個入境處靚女職員。陳為廷返抵台灣後，前晚就喺社交網站寫咗篇長文，細說心路歷程，內容當然包括埋呢位入境處靚女啦！
被形容為「大姊姊」
陳為廷憶述，前日下午一落機就被帶到一間白色細房，然後有四、五名英俊高大嘅入境處人員招呼佢，但呢啲都無令陳為廷留下深刻印象，反而一位主責佢案件嘅入境處女職員，佢形容為「大姊姊」，第一眼望見佢已被呢位「大姊姊」電暈，又話佢講嘢有禮貌，似足港產片入面嘅精英公務員。正所謂有圖有真相，陳為廷得個講字，似乎無乜說服力喎。
之後陳為廷被十幾名入境處職員護送下，預備搭飛機返台灣，佢話臨走時再問「大姊姊」邊到有吸煙室，一心諗住食支煙仔解愁，點知「大姊姊」話佢太後生，學乜人食煙吖！雖然陳為廷食唔到煙，但獲得「大姊姊」關心，真係乜都抵番晒啦！
卓妮