尹戈爾借水還魂好神

荷蘭2:1墨西哥
亨特拉爾補時射入12碼。 （Getty Images圖片）

今場波氣溫高達攝氏35度，球證分別喺上下半場給予雙方球員3分鐘嘅「飲水時間」，令到喺48分鐘落後緊1球嘅荷蘭有機會變陣，成為反勝嘅契機，教頭尹戈爾賽後都話全靠「飲水時間」：「我首先變陣打番4-3-3，之後有勁多入波機會，但畀對手龍門救到，我趁住『飲水時間』再轉plan B，咁就得咗！」

尹戈爾今場唔單止變陣反勝，更犀利嘅係佢夠膽換走今場冇料到嘅隊長尹佩斯，利用後備力量贏波，難怪荷蘭今屆世盃喺呢位戰術大師帶領下，4場入面有3場喺落後下反勝，成為世盃Comeback King。賽後尹帥被球迷捧到上天，曼聯下季喺呢位「新魔王」領軍下有「尹戈爾時間」，唔會再掛住「費格遜時間」啦！

橙軍利用飲水時間充電兼變陣。（法新社圖片）

對戰統計

尼祖迪莊恐提早收工

至於今場踢咗9分鐘就因傷離場嘅中場尼祖迪莊有可能緣盡世盃，尹戈爾話：「迪莊鼠蹊有啲唔妥，唔知可唔可以喺8強復出，但上陣嘅機會相當低。」一般而言，拉傷鼠蹊的話將要避戰一星期，但如果係撕裂，就最少要休養兩星期或以上，若然尼祖迪莊緣盡世盃，對荷蘭爭冠係一大打擊，到時又要考尹帥嘅調動功力嘞！