政情：財會孖寶前後腳闖關
立法會財務委員會（財委會）議程因為激進泛民主派議員「拉布」而「大塞車」，其中環境局局長黃錦星（星星）同商務及經濟發展局局長蘇錦樑（Greg蘇）堪稱難兄難弟，因為二人分別負責嘅「三堆一爐」同創新及科技局（創科局）開位撥款，都有極大風險被「拉布」。聞說政府內部再三考量後，決定「三堆一爐」率先於周五向財委會闖關，由星星先接招，而創科局則於下周五接力出場。
財委會因新界東北發展前期工程撥款爭議多時才獲通過，搞到議程「大塞車」，至今已有近八十項政府工程同民生撥款被積壓，即使加快速度審議，亦肯定趕唔切喺七月中立法會休會前全部處理。面對呢個難題，政府其中一種處理方法，就係要作出犧牲，根據撥款嘅重要性同緩急先後，重訂提交財委會表決嘅優先次序。
盼趕及休會前通過
據悉星星自覺今次已數夠票通過「三堆一爐」撥款，為免有政黨在暑假後又轉軚反對夜長夢多，希望趕喺休會前進行表決。不過，經過「新界東北」一役後，大家都知道財委會主席吳亮星主持會議嘅手法進退失據，因快得慢，再加上泛民對通過新界東北撥款嘅怨憤未平，極可能會遷怒於「三堆一爐」，全力「拉布」，因此將「三堆一爐」撥款優先提交財委會表決，最終可能會得不償失，分分鐘拖死其他冇咁大爭議性嘅撥款。
至於另一項有高度被「拉布」危機嘅創科局開位撥款，據悉政府高層亦好想喺休會前通過，初步計劃於下周五，即本月十一日向財委會闖關，以便在暑假正式成立創科局。部分泛民早已表明會就開位撥款「拉布」，務求令創科局再次胎死腹中。創科局讓路畀「三堆一爐」，客觀效果就係「行先死先」，星星能否打破被議員拖垮撥款嘅宿命，還看周五有冇奇招應付嘞。
大舊慢必率先布局
另一邊廂，人民力量陳偉業（大舊）及「慢必」陳志全已經就創科局開位撥款申請入咗三十二個「拉布式」修正案，包括推遲創科局成立日期，甚至幫個政策局改名為「創意及科技局」、「高科技局」，以報新界東北撥款一戰之仇。