中環出更：「AO歌王」退休 盡情學唱藝曲
有「AO（政務主任）歌王」之稱嘅民政事務局常任秘書長楊立門（Raymond），尋日五十四歲生日，亦都係佢結束三十二年政府工作生涯嘅日子，可以話係有雙重意義。不過，Raymond笑言，當年佢投考AO並唔係真正有選擇下嘅決定，如果大學畢業後唔做公務員，「唔通我話唔做AO，走去簽唱片公司咩！」
Raymond話，前晚臨瞓前諗起第二朝就係最後一日返工，已經好感觸，憶起入職當日落住大雨，同佢都係第一日返工嘅仲有依家嘅商務及經濟發展局常秘黃灝玄、財經事務及庫務局常秘區璟智。佢仲話當年好彩啲，皆因黃灝玄被派去屯門，而佢就可以喺中環返工，駐守中環大會堂做文化工作。估唔到兜兜轉轉，三十年後都係做番民政事務局，「好似上天整定咁」。
做中環人相信係當時唔少人嘅夢想，但竟然被Raymond形容為「唔係完全有選擇嘅決定」︰「當年港大畢業，考到公務員，嗰時算係天之驕子，屋企人都好開心，唔通我話唔做AO，走去簽唱片公司咩！」所以就算佢參加緊新秀歌唱大賽，都被迫要放棄歌手夢喇。
楊立門從政 放棄歌手夢
卓妮問佢，究竟當年參賽唱咩歌，點知佢就話賣個關子，如果日後再有機會參加歌唱比賽嘅話就會講喎。
Raymond今日就開始退休前休假，問佢退休有咩搞作，佢就話會全副心機學唱藝術歌曲，仲可以去吓旅行添。講起旅行，原來Raymond已經急不及待買咗機票，周六就會同太太去歐洲玩十幾日，由法國南部自駕遊到西班牙，認真寫意。
而佢尋日喺辦公室執拾物品嘅時候，就話除咗逾卅年政務生涯嘅照片一定要帶番屋企好好保存外，仲有一隻印有貓兒圖案嘅水杯都要帶走。佢話自己好鍾意貓，但唔得閒照顧，依家退休，等去夠旅行之後可能都會養番隻貓喎。
卓妮