中環出更：鍾式英語怒插韋達誠
外表粗豪、外號「Tree根」嘅民建聯議員鍾樹根，初入立法會時表現斯文低調，但最近一年佢回復真性情之後，立即屢次成功出位，風頭一時無兩，包括喺立法會會議上公然叫港視主席王維基「收皮」、接受電視訪問時話特區管治「肯肯定」有問題。尋日佢仲「威」，喺立法會鐵路事宜小組委員會，用極之「流利」嘅「港式英語」，怒插本身係外籍人士嘅港鐵行政總裁韋達誠，再次成為網民熱話！
問洋人「羞恥」點寫
Tree根起初其實係用廣東話插韋達誠嘅，話對方一年攞緊成千萬人工都十問九唔知，但講到興奮起時就唔知點解開始轉講英文：「你知唔知羞恥點寫呀？Same！Same on you！」點解佢會話「Same on you」（對你一樣）嘅？原來佢係想講「Shame on you」、即係「以你為恥」咁解。須知韋達誠身為外國人，唔識寫「羞恥」兩隻中文字都好正常啫？
Tree根之後愈講愈high，炮轟韋處事「very passive」（好被動），但點知講咗做「rarely passive」（絕少被動）。之後佢又鬧韋日日返工係咪喺辦公室發夢，但「What are is your daily work？」多咗個「are」，「You are dreaming on your office」嘅「dreaming」讀咗做「尖明」，「on」應該係「in」先啱。之後韋駁嘴話自己好專業，Tree根再中英夾雜咁鬧多佢一句「I don't think so 囉！」韋忍得住笑真係勁。
卓妮