政情：區會增聘保安捕鴿
「長毛」梁國雄等激進泛民議員，近年成日喺立法會內掟嘢同衝出座位，就連喺公眾席旁聽會議嘅市民，表現亦愈嚟愈激，令立法會保安人員嘅工作量大增，仲不時被人撞傷，好彩立法會保安人數較多，大部分都受過警察等專業訓練。不過相對於立法會，十八區區議會嘅保安陣容就薄弱得多，處理起類似衝突時往往雞手鴨腳。最近以中西區區議員許智峰為首嘅一批乳鴿（年輕民主黨黨員），多次以激進手法衝擊區議會會議，搞到唔少區議會都要紛紛增聘保安。我哋啲納稅人辛辛苦苦賺番嚟嘅血汗錢，咪就係咁樣使咗去囉！
早前許智峰連同啲白鴿黨黨友及助理，借《基本法》宣傳撥款問題大鬧中西區區議會，最終搞到有保安受傷，要由警員出手平亂。早排許智峰仲「踩過界」，聯同環保觸覺嘅譚凱邦同幾十個當地居民去咗深水埗區議會，反對政府喺該區興建插針樓，最後又係搞到流會，嘥時間兼浪費公帑。
泛民建制互轟嘥時間
輪到葵青區議會早前討論插針樓問題，民政處同區議會事先收到風，話班乳鴿又會同啲環保團體到場搞事，於是臨時請多咗六名保安員幫手維持會議秩序，仲叫佢哋着晒制服、喺會議室內企定定預備添，搞到會議氣氛相當緊張。有泛民區議員批評當局增聘保安嘅理據，質疑係咪當晒佢哋係暴民，建制派區議員就反轟泛民心裏有鬼、作賊心虛。
最後雙方就增聘保安問題拗咗成個幾鐘，直至有關方面下令叫班保安員暫時撤離現場，改喺會議室外候命，先至平息到呢場爭議。查實葵青區議會內嘅泛民同建制陣營，大部分都係反對喺該區興建插針樓嘅立場根本上就一致，都唔明有關方面點解要咁緊張，搞到要嘥公帑增聘保安員。
話時話，前日嘅東區區議會南豐選區補選由白鴿黨勝出，即係又多咗一隻乳鴿進身區議會。唔知東區民政處會唔會好快就張貼招聘廣告，急聘多幾位年輕力壯、最好識得「捕鴿」嘅保安員呢？