中環出更：有心人導航 助青年高飛
航空從業員嘅需求不斷上升，雖然本地學駕駛飛機嘅機會少，但亦無阻本地一班熱愛飛行人士追逐夢想，好多人都會專誠去外國學駕駛飛機。至於未有機會去外國嘅亦唔使灰心，事關香港航空青年團（航青團）中有唔少有心人，親力親為培訓本地航空業人才。航青團一班成員日前就舉辦慈善晚宴籌務經費，「熨斗大王」陳鑑光（Charles）、名媛趙式芝（Gigi）等名人都有現身支持。
趙式芝載學生九霄體驗
有份執教航青團嘅Gigi，目前定期都有駕駛私人飛機載航青團學生上天感受飛行體驗。佢話香港學習飛行最大限制係冇地方同銜接，就算去石崗軍營都要三千幾人輪流排期，每星期卻只開放周六及周日兩天。好似佢咁，雖然考咗私人飛機牌照，累積咗六年飛行經驗，理應儲夠飛行時數再考其他牌照，但卻冇進一步指引去邊到考、考咩牌，好迷茫，所以如將來民航學院開得成，情況就會改善好多喇！
一向鍾意揸飛機嘅Charles就話，學飛行最緊要有興趣同熱誠，所以佢冇強求愛女去學。佢仲話，小朋友有時好奇怪，你愈叫佢，佢反而愈冇心機學，好似愛女去年話準備考車牌咁，唔問都好哋哋，一問愛女就即刻推話遲啲先考。所以話興趣嘅嘢冇得逼，畀壓力可能仲適得其反添！
陳李妮愛制服 曾任地勤
博愛醫院副主席陳李妮當晚亦有現身，佢選美前都做過國泰地勤，並透露最初因為好鍾意套制服所以去考空姐，但完成所有面試後，卻因有幾百度近視而過不到體檢，忍唔住當場喊出來。就喺呢個時候，有個外國職員見到，問佢做咩喊，仲同佢講地勤一樣係着同一款制服，叫佢去試吓，結果梗係考到啦。佢話地勤嘅工作令佢成長不少，所以後來選美咪咁成熟得體囉。
卓妮