馬體會巡遊20萬fans狂賀
西甲煞科有人快樂有人愁，護級分子奧沙辛拿雖以2比1擊敗貝迪斯，卻難逃14年來首度降班嘅厄運，仲喺比賽途中發生圍欄倒塌，造成68人受傷，認真禍不單行。至於重奪聯賽錦標嘅馬體會，則舉行盛大勝利巡遊，超過20萬名粉絲熱情撐場，場面high爆。
今季西甲護級鬥得激烈，昨日凌晨煞科戰奧沙辛拿主場對住篤定降班嘅貝迪斯更發生意外，12分鐘當奧軍嘅奧利奧爾尼亞拿先開紀錄後，大批粉絲興奮得滯想衝入球場，點知場邊圍欄支撐唔住而倒塌，球證即時吹停比賽，在場醫護人員、兩隊軍醫都加入救援，貝迪斯中場艾費特尼戴耶更勇救受傷小球迷，賽後獲傳媒點名激讚。
68人傷 戴耶勇救小球迷
今次意外導致68人受傷，其中10人因骨折需送院治理，好在冇人有生命危險，結果擾攘咗半粒鐘先重新比賽，亦令同時間舉行嘅幾場護級大戰下半場要順延開波，確保大家同步進行，奧沙辛拿雖以2比1贏波，但由於幾支護級對手CF格蘭納達、基達菲及艾美利亞相繼搶到分，最終以1分之微護級失敗，14年來首度降班，陪同華拉度列及貝迪斯下季征戰西乙。
相反一搔18年之癢重奪聯賽冠軍嘅馬體會，尋日舉行勝利巡遊，從卡達朗球場前往塞爆20萬擁躉嘅海神廣場慶祝，雖則由於西班牙足總阿頭外遊，搞到冇獎盃喺手，但將帥同球迷依然勁High，唔單止有拉傷咗嘅迪亞高哥斯達現身，唔少球員仲帶埋仔女玩到癲，而隊長基比更爬上海神像上興奮大嗌，再為神像戴起球會圍巾，同埋喺三叉戟鈎起會旗，佢仲暗示要擊敗皇馬攞埋歐聯：「呢個只係開始，最好嘅都仲未嚟！」
