政情：李偲嫣放「蜂」對抗「驅蝗」
香港近月接二連三有組織發起「驅蝗行動」及「拉篋行動」，為針對呢啲涉嫌歧視內地旅客嘅行為，正義聯盟召集人李偲嫣尋日開記者會話，計劃明日發起「蜜蜂行動」，喺尖沙咀文化中心附近派宣傳單張及二萬個蜜蜂襟章。佢話蜜蜂嘅精神同港人一樣，係勤奮、合群同包容，所以希望喚醒港人文明思想，要將香港嘅文明花粉帶返內地喎。佢哋嘅連串行動，唔知會否激發驅蝗行動成員一併去驅蜂呢？
設關注組助受害商戶
李話公道自在人心，遇到挑釁就會向警方求助。佢又話蝗蟲喺舊約《聖經》入面係指魔鬼，所以呢種指摘係嚴重指控，既然港人自視咁有文化修養，國際視野又咁高，就唔應該咁形容內地旅客，好明顯呢啲係玩嘢嘅行為，所以佢哋要求警方嚴正執法。
佢再指，就算香港有言論同集會自由，但驅蝗者辱罵遊客，又令周邊店舖紛紛閂門，造成損失。所以聯盟會成立一個有法律顧問團隊嘅「驅蝗行動事件關注組」，向油尖旺區受影響約四十個商戶同居民提供免費法律諮詢，協助佢哋向生事者追討賠償。