政情：深度遊香港 玩得要夠「勳」
台灣一向係港人短線遊嘅首選，唔少年輕人近年仲愈玩愈「偏」，發掘當地非傳統旅遊景點「深度遊」添。以港台經濟文化合作協進會（協進會）為對口單位嘅台港經濟文化合作策進會（策進會），該會董事長劉德勳尋日旋風式訪港兩日，亦寧願唔去廣東道購物，學人玩深度遊添！
嘗圍村盆菜 參觀三棟屋
本身係客家人嘅劉德勳，尋日應港台客屬同鄉會邀請發表演講，歌喉了得嘅佢仲即席清唱《客家本色》冧同鄉。今次訪港短短兩日，劉德勳話冇計劃同香港官員交流，但已經諗好今日臨飛前，會先深入屯門品嘗圍村盆菜，同參觀荃灣三棟屋博物館。似乎佢相當識食又識玩，鍾意歷史文化深度遊喎！
提起旅行，內地近年先後對港台開放個人遊政策，但香港方面就引起唔少中港矛盾，劉德勳就話，個人遊對台灣影響唔算大，始終台灣比香港大得多，就算多咗旅客都可以分散佢哋去唔同地區觀光，順便帶動當地經濟，未見有大規模「反陸客」行動喎。無計啦！香港地小人多係先天不足，好難同台灣一概而論嘅。