政情：長毛為拉布玩埋UFO
立法會議員梁國雄（長毛）早已揚言會就財政預算案「拉布」，原來佢已經蓄勢待發，仲天馬行空到拉埋不明飛行物體（UFO）落水添！我哋尋日講過班議員就預算案向政府各部門提出咗六千八百多條問題，但當中最搞笑係長毛無喇喇問商務及經濟發展局過去五年花咗幾多人力同公帑喺處理UFO事宜。佢仲大條道理話，問UFO係等辯論同「拉布」時都有得講吓喎。雖然長毛講到咁，但立法會主席曾鈺成對「剪布」仍束手無策。
長毛就財政預算案向政府提咗幾百條問題，其中一條就係問商經局過去五年接獲咗幾多宗市民目擊UFO嘅報告，又問有關部門喺處理關於UFO嘅事宜上用咗幾多公務員、花咗幾多公帑。對政府公共開支關注到連UFO都問埋，長毛呢條問題都認真冷門，究竟係有關注UFO嘅團體託長毛問政府吖？定係長毛自己同UFO有咩淵源呢？
長毛就話，問呢條問題並唔係因為有街坊或團體託佢問，只係佢想知道政府有冇花錢喺處理UFO事宜上，等辯論「拉布」時都有得講吓咁話。至於UFO事宜係咪真係由商經局回答，長毛都唔係太清楚，總之問咗先喎。真係唔知佢為咗「拉布」可以去到幾盡，除咗UFO之外，仲會唔會有其他更稀奇古怪嘅提問呢？
方案未傾好 主席剪唔到
早前曾鈺成就「剪布」四招向議事規則委員會提意見，委員會尋日就召開閉門會議討論，不過開咗成兩個鐘會議，最後都係煲冇米粥收場。建制派議員梁美芬話，「剪布」要經內務委員會三分之二議員贊成、再交大會分組表決嘅做法係違反《基本法》。
不過，泛民陣營嘅李卓人就認為，早前長毛就曾鈺成「剪布」提出嘅司法覆核，一日未有裁決，都唔應該商討「剪布」問題。基於大家都未有共識，委員會主席譚耀宗都只好死死地氣咁話，「剪布」方案係唔會趕得切喺財政預算案「拉布」時大派用場喇，意味今年「拉布」馬拉松將繼續進行，分分鐘又再次步入「財政懸崖」危機。