政情：易主有運行 許仕仁前愛駒又贏
尋日沙田馬場舉行中文大學校友會聯會盃，結果由團體馬「各適其適」以大熱姿態奪魁。呢隻靚駒今個馬季已經連續第三度跑出，狀態大勇，其實佢往績只屬一般，僅試過一次跑第二。原來「各適其適」前馬主，正是去年牽涉貪案嘅前政務司司長許仕仁，當時從未贏過，後來馬匹轉手後卻頻頻拉頭馬，唔通匹馬行運同易主有關？
「各適其適」如有神助
一向愛馬嘅許仕仁，曾經活躍於馬圈，名下擁有「大師」、「知己知彼」等多隻馬匹。之但係由前年開始，佢忽然宣布辭任上市公司執董，又忍痛將愛駒賣出。根據馬會嘅規定，馬主一旦賣馬，就等於永久放棄做馬主嘅資格，歷來鮮有馬主賣馬，所以許仕仁有此異動，一度惹來大家議論紛紛，揣測佢嘅健康出現問題。直至去年三月爆出佢涉收取新鴻基地產厚禮貪污而被捕，佢亦因此絕迹馬場及公開活動。
至於呢匹四歲嘅新西蘭自購馬「各適其適」，就喺許仕仁棄養冇幾耐，由紅駿團體經馬會以二百六十一萬元投得。易主之後，駿駒竟然如有神助，屢獲佳績，究竟係事有湊巧，定係匹馬漸能發揮潛能，就真係不得而知喇。