魔獸掛住玩 湖人眼坦坦
湖人最近黑氣纏身，早前有高比拜仁受傷，又連環不敵鳳凰城及巫師兩支弱旅，爭入季後賽任務告急，陣營個個愁眉苦臉，偏偏杜域侯活（Dwight Howard）就懶理球隊死活，連日來玩轉機場及娛樂頒獎禮，適逢「紫金兵團」再有占美臣（Antawn Jamison）受傷，明早訪勇士展開惡砌客場之旅，相當艱巨！
（now 678及中央5台周二早上10時30分直播）
據《洛杉磯時報》透露，杜域侯活大前日一時興起，到洛杉磯國際機場為達美航空客串地勤，先為旅客辦理登機手續，繼而又「嗌咪」發廣播，幾乎玩轉機場。童心未泯的「超人」仍未玩夠，昨日就出席第26屆KIDS' CHOICE頒獎禮，玩到成身黏液兼「四萬咁口」，難怪事後被美媒《ESPN》揶揄「做騷比打波更落力」！
占美臣受傷要抖
畢竟湖人爭入季後賽任務尚未成功，明早開始便展開4場作客之旅，先後面對勇士、木狼、公鹿及帝王，當中勇士要為西岸第6位而戰，公鹿則仍要搏老命奠定東岸第8席位，可謂場場惡砌。況且「紫金兵團」剛有占美臣因右手腕肌肉撕裂，明訪勇士受讓1.5分都信唔過，捧上盤。
本報綜合報道