民建聯主席譚耀宗（譚Sir）同商界議員林健鋒（Jeffrey）縱橫政圈多年，好少失手，點知尋日兩人都先後擺出烏龍，最終要由全國人大常委會法律工作委員會主任委員喬曉陽親自澄清。
建制派三十多名議員尋日喺深圳同喬老爺座談，首先「擺烏龍」嘅係曾參與基本法起草工作嘅譚Sir，事關佢介紹喬老爺出場時，竟然稱呼佢做基本法委員會法工委主任，搞到喬老爺笑住口否認，逕自介紹自己新職其實隸屬全國人大常委會，之後又趁機介紹新任基本法委員會副主任張榮順畀大家認識。
其後輪到Jeffrey，佢喺座談會中段引述喬老爺部分普選特首言論畀傳媒，話「中央對普選行政長官嘅立場堅定不移，特首應該愛國愛港，如果係同中央政府對抗嘅人，係對香港不利，係唔能夠接受。」點知喬老爺喺傳媒五分鐘拍攝主動澄清話，知悉手機載有佢嘅小部分言論，「說我講不能選對國家不利，對香港不利的人，我沒講這個話，媒體就登出來，變成我講這個話，這個話就寬了。我講得很清楚，就是不能接受與中央對抗的人。」
一定唔錯嘅應該係劉皇發，佢話佢因為聽唔明，拒絕引述會上討論內容。