政情：校長盃鬥波 徐立之沈祖堯齊避戰
由香港大學、中文大學合辦嘅第十屆兩大校長盃足球賽，尋日喺港大何鴻燊體育中心舉行，港大校長徐立之同中大校長沈祖堯到場主持開波儀式，但就冇落場。沈祖堯自認唔識踢波，無謂獻醜，而早年曾落場「戥腳」守龍門嘅徐立之，就笑言近年疏於練習，即使「隻腳好痕」都唔敢落場，怕扭親腳喎。
一比一握手言和
一年一度嘅兩大校長盃自○三年起舉行，以紀念兩間院校合作對抗沙士之役，但賽事過去九年由中大獨領風騷，除咗長勝六場之外，上年更勁送港大三隻光蛋，難怪徐立之講起自己隊波時似乎自己知自己事，自爆隊友來自唔同學院，部分都係落場之前先認識兼自我介紹，有啲甚至一年先踢一次波，所以踢起上嚟抽筋、拗柴都係人之常情，唔怪得徐立之強調最緊要「友誼第一」啦！
好彩，港大尋日最終以一比一同中大打成平手，叫做執番身彩，為下年卸任嘅徐立之挽回少少面子。另一邊廂，近來積極減肥嘅沈祖堯雖然冇落場踢波，但佢自己平日鍾情打網球同羽毛球，加上囡囡向佢施壓要求定時食素，瘦身行動似乎漸見成效，沈祖堯更笑稱「褲頭開始有啲鬆」，狀態似乎愈來愈勇！