全國人大政協兩會已經開幕，到咗北京列席全國人大會議嘅特首梁振英（CY），前晚出席特區政府喺北京飯店舉辦嘅酒會，宴請一眾港區人大代表同政協委員。早前嘅雍澄軒分拆酒店房間出售事件，令外界關注會否影響CY同長實等地產商嘅關係，但CY喺酒會致詞完畢落台後，隨即與台下嘅長實集團副主席李澤鉅交談咗一段時間，期間兩人笑容滿臉，並非如外界所講存在好大矛盾。至於兩人傾過啲咩內容，據聞CY喺會後向傳媒話，佢哋只係閒話家常。
