政情：輸畀KS唔忿氣 黑英苦研慳半度電
環境局局長黃錦星（KS）作為新丁局長未必係最標青嗰位，但佢就成功令環保界風起雲湧，令環保界元老人人自危，掀起咗一場慳電戰。講到慳電環保，建築物節能專家出身嘅KS認第二，冇人敢認第一，連出晒名慳到只有兩套西裝兩對鞋嘅天文台前台長林超英（黑英）都公開話輸得心服口服。不過，原來黑英一直對輸畀KS耿耿於懷。
掹插蘇 凍水浴
黑英去年喺電台節目大爆KS屋企每人每日只用一點五度電，仲大讚KS以身作則，局長之位當之無愧。不過，原來大方背後，黑英呢位環保元老對KS嘅慳電能耐大為震驚，佢自認已經好慳電，每人每日只用兩度電，但都不禁要問：「佢（KS）係點做到嘅呢？」經過幾個月嘅研究，黑英尋日喺電台節目宣布，佢已經成功練成屋企每人每日只用一點五度電嘅慳電絕技！
究竟嗰○點五度電係點慳番嚟嘅呢？黑英話好簡單，一字寄之曰﹕「掹」，有插蘇唔用要掹，連備用叉電插蘇都要掹，總之見電掣就掹，掹掹吓就慳到度電。另外，沖凍水涼，咁又慳番啲電，最後買埋個細啲嘅水煲，每次煲水煲少啲，每人每日○點五度電，就係咁慳番嚟o架喇！