九巴原先宴請全體元朗區區議員尋日春茗，諗住聯誼吓，但當中至少三十位區議員前日事先聲明話會杯葛春茗，齊齊唔出席，以示抗議九巴平均加價百分之四點九，同擔心九巴重組路線時會削減巴士路線同班次。聽九巴講，結果春茗計埋九巴同事及唔同派別嘅議員最後都坐到一圍枱。咁究竟係唔係九巴人仲多過議員，元朗區議會交通及運輸委員會主席陸頌雄就話，「有幾個議員去囉」。
議員杯葛春茗嘅其中一個主因，係重組路線，影響服務，有份杯葛春茗嘅議員李月民前日話，佢收到風，九巴建議削減269M巴士路線，要乘客喺大欖隧道轉乘其他路線至可以出到市區。
不過，九巴就話議員收錯料，堅稱元朗區嘅重組路線計劃現在仲傾緊，九巴亦都無計劃要取消269M路線，叫居民可以放心。
九巴話一系列同地區溝通嘅會議中都無提及取消269M路線，九巴對元朗同天水圍嘅乘客非常重視，現時呢區嘅路線重組仲喺收集各方意見嘅階段，仍未有具體方案。