NBA驚爆禁藥疑雲大帝尼爾遜有排煩
NBA驚爆禁藥風暴！今年美國體壇連環爆出禁藥醜聞，繼單車名將岩士唐（Lance Armstrong）及紐約洋基球星洛迪古斯（Alex Rodriguez）之後，就連NBA巨星都捲入這個熱門話題！據一名邁阿密診所的離職員工爆料，熱火超級巨星「大帝」勒邦占士（LeBron James）及魔術控衞尼爾遜（Jameer Nelson）都屬禁藥賣家波殊（Anthony Bosch）的「客仔」，2人每月定時購入類固醇及生長激素，以提升比賽表現，如果此為「堅料」，肯定震驚世界體壇！
賣家前會計爆料指名道姓
今次爆料的是曾經獲波殊僱用為會計師的Jessica，她於2010年至2012年期間為波殊旗下一間邁阿密診所「揸數」，Jessica昨晨向美媒《IBN》爆料，公司以賣抗衰老藥物做牌頭，實際上就賣類固醇及生長激素，大部分客人均屬有頭有面的運動員，為保密起見，只會在數簿上以顧客姓名的頭一個英文字母記低交易紀錄。被問到那些名字最印象深刻，Jessica隨即提到「LJ」及「JN」兩個顧客代號。
該位波殊舊夥計稱：「『JN』即係尼爾遜，佢會親自上嚟畀現金買貨，『LJ』就係勒邦占士，雖然佢冇蒲過頭，但成班同事都知佢就係『大帝』，一個叫Mr.Paul嘅人仲會每個月上嚟幫佢攞藥，佢係占士嘅好友兼經理人列治保羅（Rich Paul）！」《IBN》刊登這篇報道的同時附上一段對話錄音，不少美國網民聽完之後都在討論區熱議，有網友更睇死「大帝」有用藥：「你睇佢髮線後移成咁，就知係副作用啦！」
兩大嫌疑犯明早對碰
禁藥醜聞吹到似層層，不過「大帝」就一於少理，昨日貢獻「20+10」的強勁數據率領熱火作客以97比81擊敗木狼，連贏15場，締造球會史上最長連勝紀錄，明早面對由另一位禁藥主角尼爾遜孭飛的魔術，照計可以再下一城，主場讓到12.5分照捧上盤。