中環出更：包陪麗撐同鄉 聯展浮世雕
著名中國當代雕塑家向京及瞿廣慈兩夫婦，前日喺灣仔藝術中心包氏畫廊舉辦首次聯展《浮世鳥語》，藝術中心名譽主席包陪麗（Cissy）現身力撐兩位好友。Cissy話，佢同瞿廣慈於兩年前首次合作舉辦展覽時相識，大家都係上海人，夠晒同聲同氣，至今收藏咗唔少對方嘅作品。
瞿廣慈盼港成傳播平台
兩位來自內地嘅夫妻檔藝術家，對香港嘅印象各有見解。瞿廣慈坦言，香港嘅文化水平仍有改善空間，但佢亦睇好香港可成為文化與藝術傳播平台。向京就話，覺得香港人做事好勤快，仲大讚香港女性好靚同皮膚好好添！雖然佢嚟過香港好多次，但每次嚟到都好鍾意品嘗地道美食，好彩佢食極唔肥，依然fit到漏。
今次雕塑展分開兩部分，包括向京嘅《我看到了幸福》以及瞿廣慈嘅《鳥兒問答》，二人希望透過雕塑各式各樣嘅中國人物，細緻刻畫出當今世人獨特狀態。雖然作品造型唔同，但同時帶出冷靜感覺，就好似喺局外觀看浮世一樣。今次展覽為期一星期，部分收益將會撥捐藝術中心作藝術發展基金用途。
卓妮