中環出更：林樹哲薦福建五虎從政
福建幫喺香港有一百一十萬人咁多，佢哋想增加政治影響力嘅雄心壯志愈來愈明顯。尋日香港福建同鄉會舉行新一屆就職禮，閩籍重量級人馬齊集。曾經當面向候任特首梁振英大力推薦閩籍青年才俊入政府嘅福建社團聯會主席林樹哲都喺度，佢同卓妮透露，最遲本月底前，會向候任特首交出一張五人推薦名單，其中兩位仲係美國名校哈佛大學畢業嘅高材生添！
林樹哲話，現時做緊最後嘅篩選工作，雖然佢心目中已有部分賢才人選，但仲未確定當事人係咪願意打政府工，事關佢哋都有唔錯嘅職業，所以仲要做埋最後嘅游說工作。究竟五個賢才係咩人呢？佢就賣關子話，其中兩位係哈佛畢業，仲話名單交咗出去之後，一定話畀卓妮知喎。
讚吳秋北明日之星
轉頭卓妮見到福建籍嘅工聯會理事長吳秋北，佢咁後生又熟悉政治工作，啱晒入政府要求啦！林樹哲一見到佢就豎起大拇指，勁讚佢係福建幫嘅明日之星，唔通佢係五名人選之一？有「關島王」之稱嘅福建僑領陳守仁亦嚟撐場，佢表態支持長子陳亨利出戰九月立法會選舉，仲話家族生意仲有兒子可接手打理，亨利可以放手一搏喎！