位處中環昃臣道嘅立法會大樓冇耐之前搞過一場衣香鬢影送別派對，議事堂嘅新知舊雨表現得濃情化不開，意味政府將會有一連串大動作。呢家嘢巴閉咯，叫做喬遷之喜，立法會又要搬，政府總部又要搬，齊齊搬去添馬艦新大樓。同一時間，終審法院亦都要搬，搬返去本來就係用嚟審案嘅立法會大樓。
上屋搬下屋，唔見一籮穀，搬遷大計有冇乜嘢阻滯咁呀？哈，講起上嚟認真頭痕，添馬艦政府總部以及立法會大樓原定今年五月交樓，點不知家陣已經七月尾嘞，地盤仍然沙塵滾滾，建築材料七零八落。你知啦，曾蔭權一早打定如意算盤，今年十月發表最後一份夕陽無限好、只是近黃昏嘅施政報告，務必要喺號稱「門常開」嘅新政府總部粉墨登場，萬一無法趕得切完工，顏面不知何存，唔通叫佢企喺溶溶爛爛嘅地盤表演棟篤笑咩？
所以咯喎，聽講煲呔曾落咗一道死命令，唔理你日夜加班又好，唔理你冇得放假都好，一定要喺十月之前落成啟用！
講到呢度，功夫茶有感而發，因為諗起導致死傷枕藉嘅溫州高鐵車禍。內地同胞有一則微博係咁嘅：「中國，請停下你飛奔的腳步，等一等你的人民，等一等你的靈魂，等一等你的道德，等一等你的良知！不要讓列車脫軌，不要讓橋樑坍塌，不要讓道路成為陷阱，不要讓房屋成為廢墟。慢點走，讓每一個生命都享有自由和尊嚴。每一個個體，都不應該被這個時代拋棄。」
即係咁，官員好大喜功往往害慘平民百姓，若然地盤工人為咗服務曾蔭權而以「飛奔的腳步」日夜趕工，會有乜嘢後果呢？忙中有錯都唔講嘞，天時暑熱對於工人嚟講絕對係地獄式苦差。喂喂喂，天文台不斷發出酷熱警告，你唔好當佢流嘅先得㗎。事實上已經有工人家屬去信行政長官辦公室訴苦，要求改善惡劣嘅工作環境。新政府總部嘅工作環境有幾惡劣？一個數字足以嚇鬼死你：攝氏四十二度！
功夫茶真係唔敢想像四十二度之下身水身汗擔擔抬抬係乜嘢感覺，唔好講話熱到猝死，淨係中暑已經大鑊。所以話啫，內地同胞嘅微博同樣適用於好大喜功嘅曾蔭權：煲呔，請停下你飛奔的腳步，等一等你的人民，等一等你的靈魂，等一等你的道德，等一等你的良知！
總之，寧願延遲完工，好過搞出人命，長官面子冇可能凌駕百姓安危。高鐵車毀人亡歷歷在目，特區政府冇理由照樣草菅人命啫，吓話？