政府成日話唔驚香港被邊緣化，但係又攞唔出長遠發展藍圖，就算規劃好嘅基建項目，十個有九個都例遲。樣樣一拖再拖，莫講話難以保持競爭優勢，唔包尾都算執到咯。
呢嗱，當局計劃興建屯門西繞道同屯門至赤鱲角連接路，作為港珠澳大橋嘅配套工程，但呢兩條路最少要延誤兩至三年至起好，唔能夠喺二○一六年同大橋同步通車。港珠澳大橋因為咁變咗「掘頭路」，完全發揮唔到應有作用，分分鐘淪為得個睇字嘅大白象工程。
兩條新路可以提供來往新界西北同大嶼山最直接嘅路線，將深圳灣公路大橋、港深西部公路同機場以及日後嘅港珠澳大橋直接相連。通車後，由新界西北到大嶼山路程可以縮短廿二公里。總之一句講晒，新路對粵港兩地經濟融合舉足輕重。
更重要嘅係，按港府嘅如意算盤，新路通車除咗可以減輕屯門公路、汀九橋、青嶼幹線等現有道路嘅車流壓力，加強本港物流業嘅競爭力，仲提供另一條往來機場嘅陸上通道，可以進一步鞏固赤鱲角機場作為國際及區域航空樞紐嘅地位。
講真，周邊地區發展一日千里，香港因為當局目光如豆，基建長期滯後，競爭優勢正一王小二過年，一年不如一年。連北大人都睇唔過眼要出聲，批評港府缺乏長期、科學嘅規劃。屯門西繞道同屯門至赤鱲角連接路對香港長遠發展咁重要，當局居然仲要拖多幾年，等得嚟，香港早就被邊緣化，到時想追都遲啦！
其實屯門西繞道嘅地區諮詢已經擾攘咗超過三年，路政署先後提出多個方案，因為區議會同居民擔心受滋擾，被迫改來改去，拖累埋屯門至赤鱲角連接路嘅進度。兩條路原計劃今年開工，路政署日前話，預計最快要兩年後至動工，而且仲係「大約」，唔作得準㗎。運輸業人士講得啱，事件完全係港府議而不決、規劃失誤嘅惡果。
仲有條數港府未交代㗎，新路遲遲唔動工，唔止香港長遠發展受影響，連累納稅人荷包亦遭殃。工程拖得愈耐，造價升得愈高，到時埋單計數，肯定超支一大橛。呢，最典型例子就係港鐵沙中線嘞，嘈咗幾年至動工，工程造價由本來預算嘅三百八十幾億元，激增到超過六百億，多咗二百幾億，問你服未！
基建基本遲建，議決議而不決，人哋話慢工出細貨，港府就慢工出貴貨、出廢貨。坐而論道，紙上談兵，工程完工已經錯過發展嘅黃金機會，得不償失。計功夫茶話齋，旨意呢班日日等退休嘅港府官僚，香港遲早淪為中國二、三流城市。