中環出更：新地酒店開幕名人登高撐場

新地副主席兼董事總經理郭炳江同弟弟郭炳聯下午五點幾到場打點，逾二百位貴賓如魚貫進場，城中富豪畀足面，除咗新世界主席「彤叔」鄭裕彤外，仲有唔少富豪兄弟班，包括恒基地產主席李兆基兩位公子李家傑及李家誠、霍英東家族兩位掌舵人霍震霆（Tim）及霍震寰、旅發局主席田北俊及弟弟田北辰等。而嘉華主席呂志和及港鐵行政總裁周松崗都嚟撐場，陣容頂盛。

開幕儀式氣勢十足，大會安排一條長近180米，要由逾百位舞蹈員舞動嘅巨龍展開序幕，又邀請國際著名歌劇天后Katherine Jenkins演繹一首意大利名曲，令賓客聽出耳油。儀式結束後，郭氏兄弟做嚮導，帶VIP嘉賓參觀酒店，感受各餐廳嘅氣氛同美食。

霍震霆（右）帶埋公子霍啟山嚟飲開幕酒。

鄭裕彤到賀，主動對鏡頭揮手。

賓客最有興趣就係感受搭極速快感，事關由地下搭抵達102層嘅餐廳，只需一分鐘。卓妮試坐過，絕冇頭暈，亦冇耳仔痛！

恒基李家傑（右二）及李家誠（左二）結伴到場，新地老闆郭炳江（右一）及弟弟郭炳聯（左一）親自招呼。 （麥潤田攝）

香港麗思卡爾頓酒店居高臨下，盡覽西九龍無敵海景。

有份出席派對嘅Tim霍話，同郭家係多年老友，加上酒店咁高咁有特色，所以帶埋公子霍啟山去睇睇。講起大仔霍啟剛嘅婚事，Tim霍就鬼馬地回應一句：「Okay！拜拜！」

郭炳湘越洋發賀電

新地辦喜事，但就唔見老大兼新地非執董郭炳湘現身，原來佢正同媽咪郭老太鄺肖卿外遊，順便慶祝母親節。不過，佢照樣發出越洋賀電，表示對酒店開幕感到十分高興同鼓舞。佢又話ICC同對岸嘅國際金融中心得到國際關注及認可，為新地帶來非常理想及穩定回報，證明佢當年嘅眼光十分準確喎！