政情：華叔聖誕派對開香檳

早前華叔開到聲希望可以搞聖誕派對，一班徒弟、朋友當然唔會令佢失望，尋日民主黨張文光、李永達、涂謹申，支聯會李卓人、蔡耀昌同埋華叔屋企人一行廿幾人，浩浩蕩蕩咁帶埋聖誕蛋糕、雪糕、朱古力同一堆小食，去醫院同華叔賀聖誕。雖然只係短短半個鐘嘅聚會，已經令華叔好開心。

張文話尋日華叔氣息唔錯，可以落床周圍行吓，不過唔可以亂食嘢，所以即使開派對，都只係食咗啲蛋糕同朱古力。李卓人將喺挪威出席諾貝爾和平獎頒獎禮時收集到多個民運人士簽名嘅Ｔ恤，送畀華叔做聖誕禮物，華叔愛不釋手。阿人連當日佢哋喺挪威遊行時手持嘅火炬，都拎埋畀華叔睇。張文話華叔不停咁研究點先可以點着火炬。有咁多朋友嚟睇佢，華叔總算老懷安慰。