中環出更：劉美詩報攤買煙樂悠閒
康泰旅行社前一姐劉美詩（Susanna）退下戰線已有三個多月，呢幾個月佢輕鬆享受悠閒嘅「無業生活」，經常約埋一大班老友外遊，所以要搵佢都唔容易。不過，卓妮似乎同Susanna好有緣，早前有日下晝四點半鐘，卓妮竟然喺中環萬邦行遇到佢，見佢一路行一路埋首喺手袋搵嘢，原來係攞錢去報攤買香煙。
Susanna喺九月離開康泰後，約埋十幾個朋友去咗日本北海道自駕遊，喺網走一帶玩咗十幾日，雖然Aurora破冰船呢個時候仲未有得坐，但佢就食盡日本燒蠔、鱈場蟹等地道美食，之後又暢遊韓國首爾，玩轉日韓兩國。
Susanna現正計劃同朋友去澳門或返內地玩短線遊，佢話離開咗旅行社，先至得閒以旅客身份享受旅遊嘅逍遙樂趣！
節目多籮籮 一定會復出
雖然Susanna無工一身輕，但每日依然好忙，屬於無壓力嗰種忙，忙住約朋友歎下午茶、打麻雀、行街、唱卡拉OK等，節目多姿多采，所以暫時仲未打算搵工做。咁又係嘅，佢喺事業上衝咗咁耐，有機會好應該抖吓，況且打工只係人生一部分。
不過，Susanna話，抖夠後一定會復出，但佢希望搵份無咁辛苦嘅工作，寧願薪酬少啲都無所謂。
Susanna上月應邀到城市大學做客席講師，為副學士講四堂市場學，據聞佢對住啲學生好緊張，但佢話好享受教書嘅過程，帶來好大滿足感，加上班學生又乖，所以日後唔排除會再去講學。
卓妮