政情：立會四月豪訪北美
立法會議員多次被質疑借外訪為名外遊豪玩，佢哋批評接受，做法照舊，其中發展事務委員會轄下嘅海濱規劃事宜小組委員會，九月本來訪問美國紐約、波士頓、巴爾的摩同加拿大溫哥華，押後行程後，現建議下年四月起程，外訪九日。秘書處文件顯示，外訪團若採用最豪玩法，每人要使八萬九千元，絕對係超級豪華團。
北美「豪華團」原定九月起程，但當時可能好多議員放緊暑假，陪屋企人大過天，報團反應麻麻，於是押後行程。立法會秘書處早前再發文件畀委員，指委員會主席劉秀成建議四月二十四日至五月二日再組團成行，睇吓月曆，啱啱橫跨明年復活節同五一勞動節兩個大節日。
文件指報團議員行程中嘅食住行開支不菲，如果搭飛機坐經濟客位，每人要三萬七千元；如果頭尾兩程坐商務客位，更加要八萬九千元，一次就「碌爆」四年任期內嘅五萬五千元外訪總津貼額，所以議員如果想公帑遊埠，一定揀前者啦。