政情：鄉局新廈明春入伙
耗資一億七千萬元興建嘅鄉議局沙田石門新樓，鐵定於明年四月二日入伙，並於五月擇日舉行開幕典禮。為慶祝新大樓啟用，早前贊助四千多萬元予鄉議局興建新大樓嘅香港賽馬會，再特別批准該局毋須承擔任何贊助，可於明年二月二十日喺沙田馬場舉行「鄉議局盃」，馬會對鄉議局真係好支持。
不過，由於鄉議局目前尚欠幾千萬元新大樓建造費，該局已委託兩間測量師行為現時九龍塘局址估價，研究出售可行性，並委託另一間測量師行為上址進行多項重新發展嘅價值研究，暫時未有定案。
講開又講，村代表選舉、鄉事委員會選舉及鄉議局改選將於明年上半年舉行，鄉議局主席劉皇發預期，該局將會面對愈來愈多嘅政治衝擊，無論選舉結果如何，佢呼籲鄉紳團結，否則原居民權益難以保障。同發叔一齊參與屯門龍鼓灘原居民代表選舉嘅候選人有劉國明、劉威平及劉東海。