政情：李宗德蒙德揚暢談追女經
早前著名女校嘉諾撒聖瑪利書院舉行一百一十周年紀念晚宴，主家席就出現咗兩位男士，佢哋兩位都係好支持聖瑪利嘅喇沙舊生——公民教育委員會主席李宗德同信興集團副主席蒙德揚，仲異口同聲話無諗過要做「女校男生」。
佢哋諗番讀書嘅時代，經常有聯校活動，要追女仔唔需要乘機追，而係可以大大方方擺到明去追。佢哋覺得年輕人追女仔好正常，學習交往社交亦唔係壞事，而且佢哋嗰個年代男女交往好單純，唔會有咩大事發生。
剛剛喺九月尾再度榮升外公嘅李宗德今次終於有女孫抱，開心得佢笑到見牙唔見眼，不過佢話呢排有啲傷風，為免傳染，所以都唔敢接近幾個乖孫。講開依家小朋友爭學位好激烈，做家長都好緊張小朋友入讀邊間學校，李宗德就話最緊要都係睇小朋友興趣，所以都唔一定要入讀名校嘅。