中環出更：好友另起爐灶肥亨念舊捧場

福臨門老臣子

「國福樓」嘅經理陳年及廚師長陳佑良，以前係灣仔富豪飯堂「福臨門」嘅老臣子，分別做咗三十幾年同十幾年，陳佑良更係本港富豪御用大廚，已故恒生銀行創辦人何善衡、全國政協常委何鴻燊、新世界董事總經理鄭家純等名人都點名要佢到會。肥亨係福臨門常客，與年哥相識多年，當佢知道年哥同舊班底另起爐灶打造新富豪飯堂，當然第一時間去試菜啦！

難得肥亨畀面光臨，年哥特別安排多味巧手名菜，包括揀選一斤唔超過六隻、大小適中嘅田雞，炮製一味「椒鹽田雞腿」，肥亨勁讚田雞腿鮮甜嫩滑。另一味功架十足嘅菜式係「菊花燴蛇羹」，肥亨讚蛇肉好香滑，湯底又清，同外間濃稠嘅湯底好唔同，唔少名人試過都讚不絕口。原來當日係肥亨今年第一次歎蛇，估唔到就已經可以品嘗到咁出色嘅蛇羹。

另一味出色之作係「遼參鵝掌」，肥亨大讚遼參同鵝掌都炆得好腍，夠晒入味，簡直係超高水準。肥亨自從爆出患有腦血管病後，日日堅持做運動，飲食都節制咗好多，年哥就因應肥亨口味特別寫咗兩味健康嘅菌類菜式，包括頭抽炒珍菌及野菌鮮腐竹銀杏，再加多個上湯浸豆苗，夠清淡啱晒肥亨。

「國福樓」寶號嘅「福」字，係採用康熙題字，寓意「多子、多才、多田、多壽及多福」。	國福樓嘅紅酒珍藏種類繁多，包括法國一級酒莊嘅Lafite及Mouton，仲有Petrus，部分更係產量極少嘅六公升裝珍藏。	菊花燴蛇羹
遼參鵝掌	椒鹽田雞腿	煎堆仔及馬拉糕

破戒歎煎堆仔

年哥見肥亨食得咁開心，仲特登推介「國福樓」嘅蛋白杏仁茶、煎堆仔及馬拉糕三味甜品。本來肥亨話要嚴格忍口，一星期只食一次甜品，但盛情難卻下都係淺嘗一啖煎堆仔，估唔到又有驚喜，香酥不油膩，所以肥亨為佢破戒都係值得嘅！

卓妮