施政報告宣布成立百億元關愛基金，援助現行社福制度幫唔到嘅弱勢社群，被轟同政府年前成立嘅扶貧委員會冇乜分別，甚至只係將當年經扶貧委員會提出、但當局一直唔肯畀錢落實嘅建議重新推行，所以負責嘅官員好抗拒將關愛基金同「扶貧」兩隻字拉埋一齊，以免被指「炒冷飯」同限制咗基金嘅援助對象。
不過，勞工及福利局尋日向立法會提交嘅一紙文件，就篤爆咗關愛基金同扶貧委員會其實都係差唔多。事緣港府當年為咗支援扶貧委員會同落實其建議，喺勞福局開設咗一個為期三年嘅首長級第二級職位，職位名稱為「首席助理秘書長（扶貧）」。依家三年限期將至，勞福局建議將該職位再保留三年，職責包括支援關愛基金及其他多項勞福措施。
雖然職責改變咗，扶貧委員會亦早已解散消失，但勞福局並冇建議將呢個職位名稱內嘅「扶貧」改番做「關愛」，間接證明關愛基金骨子裏都係搞扶貧，名副其實係不打自招。