政情：試揸環保車 克勤仔讚好
潮流興環保，依家衣食住行樣樣都要諗下點去愛護地球，德國寶馬（BMW）就研發咗多功能遙控電動跑車MINI Cooper，吸引唔少愛揸車又愛環保嘅人。立法會議員陳克勤都試咗四日，大讚跑車上斜有力又夠靜，不過就擔心架車靜得滯，如果一時唔覺自己開咗引擎，一個唔小心可能會釀成意外喎！
克勤仔上星期五攞車，除咗用嚟代步，仲借埋畀黨友、立法會進出口界代表「象哥」黃定光試揸。克勤仔話佢哋揸去花園道政府山一轉，上斜轉彎全部都有力，又定又靜，非常吸引，不過架車仲未公開發售，就算佢哋想買都要再等等。
克勤仔又話，有車牌嘅市民如果想試揸下，可以自己聯絡BMW，不過就要先簽約，如有損毀要賠。克勤仔仲提大家，部車叉足電最多都只係行到一百三十公里，而依家戶外叉電站唔多，所以記得叉好電先好出街，如果唔係揸揸下冇電就麻煩啦！