政情：曾憲梓教炆客家豬肉
客家人嘅盛事「客家文化節2010」尋日喺大埔林村舉行重頭戲「炆豬肉大賽」，吸引唔少身為客家人嘅政商名人出席，好似前全國人大常委曾憲梓同鄉議局主席劉皇發咁，連唔係客家人嘅煲呔曾夫婦、發展局局長林鄭月娥同民建聯主席譚耀宗都去湊熱鬧，身為半個客家人嘅主搞手前民政事務局局長何志平，就有明星太太胡慧中及客家籍媽咪撐場。
曾憲梓本身係客家人，不時喺屋企食客家菜。佢話，煮客家炆豬肉，肥肉一定唔可以炆得太腍，但瘦肉亦唔可以搞到太硬，少啲工夫都唔掂。曾憲梓仲提醒大家，想煮好嘅炆豬肉，一定要用上等五花腩、靚南乳同鹹酸菜，加埋就perfect喇！
「好打得」嘅林鄭月娥尋日都係座上客，佢話自己咁耐都未煮過客家菜，近年做局長後更加冇時間煮飯添。佢話自己都識整豬肉，不過拿手嘅唔係客家炆豬肉，而係整上海竹筍炆豬肉。評判之一嘅鄧達智都係客家人，話炆豬肉絕對係客家菜中嘅主角，其他菜式都要行埋一邊。