政情：李嘉誠獲商業終身成就獎
啱啱獲《華爾街日報》公布成為本港商界十大頭條新聞人物嘅本港首富長實主席李嘉誠（圓圖），尋晚獲一個香港商業獎頒發終身成就獎，李超人兒子李澤鉅代父領獎時話，喺爸爸眼中，慈善公益事業同公司業務無分輕重，父親長久以嚟致力公益事務嘅承擔同全情投入，令佢特別尊敬父親。
李澤鉅代父領獎
終身成就獎嘅設立，係為表揚長期對香港商界及社會作出貢獻嘅人，有「小超人」稱號嘅長實副主席李澤鉅尋晚代父親領獎時話，父親嘅遠見、睿智、領導才能、勤奮精神、專注投入同埋自律嘅態度，均對佢啟發良多，身為兒子，好高興能夠同父親共事，一同將長實發展成為今日業務遍及全球五十四個國家嘅跨國企業，佢話儘管長實集團來自國際業務嘅利潤比例愈來愈重，但父親同佢心裏仍視香港為家鄉，喺香港得獎，令人倍感欣慰咁話。
其實，今次已經係李超人第二度獲呢個香港商業獎頒授獎項，九○年首屆時就獲商業成就獎，廿年後攞埋終身成就獎，可以話特別有意義。