政情：劉夢熊賣豪宅斬獲豐
過去兩年唔少人投資豪宅大有斬獲，好似近期因內地「結石寶寶之父」趙連海案而人氣急升嘅全國政協委員劉夢熊，亦無錯失機會，去年六月出售二千二百呎禮頓山單位，帳面勁賺二千四百幾萬元。
劉夢熊依家瞄實立法會功能界別區議會超級議席，根據政府建議，選舉經費上限為六百萬元，好多細黨叫苦連天，但對本身係上市公司主席嘅劉夢熊嚟講，真係濕濕碎。劉夢熊日前出席一個敦煌籌款晚會時話，自己鍾意投資豪宅，好似早年用一千八百六十萬元買入禮頓山一個二千二百幾呎單位自住，○七年佢一家搬進壹號銀海兩個共三千呎相連單位後，禮頓山單位就攞嚟收租，去年六月有大陸客洽購，最後以一筆過現金四千三百萬元易手，帳面即賺二千四百幾萬元。如果劉夢熊攞筆錢選超級區議會，足足可以選四次咁多！
劉夢熊話，物業投資一向交太太處理，賣禮頓山收番嗰四千幾萬元，全數送晒畀老婆，認真闊綽。不過依家政府落重藥壓抑樓價，樓價即時下調。問佢手頭上仲有冇物業投資，劉夢熊就話一切交畀太太處理，自己唔係太清楚喎。